Selmana de les Lletres Asturianes

Bones tardes falantes!!! Esta selmana cellebrábase la Selmana de les Lletres Asturianes y esti vienres 8 de mayu cellebraríase el Día de les Lletres Asturianes, como agora nun se puede pol coronavirus, queda aplazada del 28 de setiembre al 2 d'ochobre, siendo el  día 2 el día de les Lletres nesti casu, pero nosotros nel cole podemos cellebralo a nuestra manera. Primeru voi contaros un pocu la historia d'esti día y porque se cellebra:

• La Academia de la Llingua Asturiana (ALLA) ye la institución llingüística que trata cuestiones rellatives al estudiu, la promoción y la defensa del asturianu y del gallego-asturianu, llingües propies d'Asturies.

• Su sede ta n’Uvieu.

• Esta institución fue creada nel añu 1980, ta presidida por Xosé Antón González Riaño y ta formada por varios miembros (académicos y académiques) que son especialistes nel ámbitu llingüísticu y que se xunten de vez en cuandu pa trabayar cuestiones rellatives al asturianu y al gallego-asturianu.

• Coincidiendo cola cellebración del Día de les Lletres Asturianes, el primer vienres de mayu los miembros de la ALLA xúntense de forma estraordinaria pa nomar nuevos académicos.Así la institución va medrando añu tras añu.

L'oxetivu del día de les lletres Asturianes ye poner el focu nes lletres escrites násturianu a lo llargo la historia. Ye por esa razón que se dedica a un autor o autora de gran valor lliterariu. Esti añu dedícase a la escritora Maria Teresa Villaverde "Tuxa". Propongovos delles idees:

1. Pa los cursos de primeru y segundu: Qu'imaxinéis y faigáis un dibuxu inspirao nestos versos del poema "Tornón" d'esta escritora: 

          " Tan les sos verdes praderes

             averbenaes de flores, 

              tien frondosos 

              verxeles encantadores".

       

         2. De terceru a sextu: Con los mismos versos qu'usan los cursos de primeru y                    segundu, podéis inventar un cuentu  y facer un dibuxu d'esti.

Si tenéis alguna dulda coles pallabres o con algo que nun  entendáis, preguntáime. Recordai que tenemos un diccionariu online na páxina de la Academia de la Llingua Asturiana (sino lo tenéis en papel), déxovos l'enllace: http://www.academiadelallingua.com/diccionariu/

Un saludu y feliz Selmana de les Lletres Asturianes!